II ASEMBLEA ESTATAL DE FIARE, unha banca en mans da cidadanía.

Posted on Marzo 20, 2013 by GITs de FBE en Galiza

Vídeo deste importante II Encontro de persoas socias de Fiare:

A pasada fin de semana, Fiare-Banca Popolare Etica (Fiare-BpE) organizou a súa II Asemblea estatal en Rivas Vaciamadrid, Madrid. Máis de 350 persoas participaron nun evento moi importante para a construción desta alternativa financeira baseada nos valores da transparencia, o traballo en rede e o financiamento de

proxectos de economía social e solidaria e no terceiro sector.

O encontro empezou o venres (15 de marzo de 2013) pola tarde cunha delegación de representantes dos diferentes territorios tanto a nivel estatal (persoas coordinadoras e/ou vicecoordinadoras das 19 circunscricións de Fiare-BpE: Galiza Norte, Galiza Sur, Bilbao Centro, Bilbao Casco Viejo, Guipuzkoa, Áraba, Navarra, Madrid, Canarias, Murcia, Castilla-León, Andalucía Oriental, Andalucía Occidental, Extremadura, Barcelona, Catalunya Central, El Vallés, Baleares e Valencia) como italiano. Traballáronse temas estratéxicos como a diversidade de necesidades de financiamento, a comunicación do proxecto e a consolidación da nova estrutura cooperativa.

O sábado (16 de marzo de 2013) foi o “día grande” coa participación de 330 socios e socias presencialmente, unha vintena de persoas e organizacións convidadas e a delegación doutras 372 persoas socias. Un dos temas clave foi a presentación e discusión do plan de viabilidade de cara á integración da área estatal Fiare na cooperativa de crédito BpE, proceso iniciado hai un ano e que prevé a súa finalización antes de que remate o 2013 ou a principios do ano 2014, momento en que a primeira cooperativa de banca ética europea poderá operar plenamente no estado español. Neste sentido, informouse ás persoas asistentes sobre os novos produtos e servizos bancarios que se prevé ofertar desde a área Fiare (V área de BpE).

Procedeuse tamén na asemblea á validación da elección dalgúns membros (entre eles Alfonso -primeira persoa situada á esquerda da fotografía que tedes á vosa esquerda-, persoa socia de Fiare Galiza) do Comité de Ética estatal e da renovación dos que levan traballando neste tema durante os últimos tres anos. A socia Cristina de la Cruz -foto da dereita- foi reelexida por votación como coordinadora do Comité. O comité así establecido permitiu engadir máis pluralidade de saberes e experiencia e diversidade territorial. Tamén houbo espazo para a ratificación de Peru Sasia, con máis do 95% dos votos a favor, na súa candidatura ao Consello de Administración da cooperativa en representación da área Fiare.

Antes de que rematara a Asemblea tivemos a ocasión de coñecer a boa parte das persoas coordinadoras e/ou vicecoordinadoras dos 19 Grupos de Iniciativa Territorial (GITs) relacionadas coas 19 circunscricións que conforman Fiare-BpE. O día anterior estiveron traballando nos temas clave para o desenvolvemento do proxecto nas diferentes zonas e tamén tiveron tempo para a elección das tres persoas representantes das tres Zonas nas que nos organizamos en Fiare-BpE: Norte, Mediterráneo e Centro-Sur e que foron presentadas na Asemblea.

Reflexionouse durante toda a xornada sobre a importancia da participación das persoas socias neste momento de cambio e de ilusión cara ao futuro como cooperativa de crédito. No territorio galego, os GITs Fiare Galiza Sur e Fiare Galiza Norte (coa colaboración da asociación Fiare Galiza) e os seus respectivos grupos locais (Vigo, Pontevedra, Ourense, Coruña, Compostela, Lugo, Ferrol) son os referentes de difusión nestes momentos para o proxecto Fiare nestas terras.

FIARE é unha organización de banca ética con 3.886 persoas socias e máis de 4 millóns de euros en capital social a nivel estatal. Na actualidade ten financiados proxectos por valor de 31 millóns de euros, e o aforro de persoas e organizacións ascende até os 33 millóns de euros. Os seus principais ámbitos de financiamento son proxectos vinculados á transformación no campo dos valores e a educación, a inserción social e laboral das persoas, a agroecoloxía e o comercio xusto e a cooperación norte-sur.