Grandes novas na Asemblea Extraordinaria de Banca Etica!

O ano 2015 rematou con interesantes encontros: no mes de outubro de 2015 celebramos o encontro intergit galego e a asemblea de Fiare Galiza, a finais do mes de novembro de 2015 puidemos participar na Asemblea Extraordinaria de Banca Popolare Etica (coñecida como Banca Etica en Italia) -a primeira vez que se fai de forma simultánea no Estado español e no italiano- e as xuntanzas do GIT Galiza Norte e do GIT Galiza Sur das que nun vindeiro artigo no novo blogue vos falaremos.

Coas grandes novas transmitidas na Asemblea Extraordinaria queremos comezar este ano 2016 (tes moita máis información a partir do parágrafo seguinte) que vén cargado de cambios.  O primeiro é que este blogue www.fiaregz.com vai quedar como un punto de consulta de documentos ou de artigos antigos xa que agora imos darlle vida ao novo blogue que podes coñecer facendo clic en www.fiarebancaetica.coop/git/gl/galizia.

“As persoas socias de Banca Etica, reunidas en Padua (Italia) e en Barañáin (Pamplona, España) en asemblea extraordinaria o sábado 28 de novembro de 2015, aprobaron algunhas modificacións importantes dos estatutos do banco relativas aos seguintes temas:

• elección dos membros do consello de Administración;
• organización territorial das persoas socias para favorecer a participación na vida do banco;
• posibilidade de facerse socio/a e votar a distancia;
• introdución do concepto de «Portadores de Valor».

A deliberación resultou en 1219 votos a favor, 94 votos en contra e 76 abstencións. Púidose votar mediante un dispositivo electrónico, mais a verdadeira novidade foi a celebración simultánea da asemblea en Padua e Barañáin (Pamplona-España) con conexión de audio e vídeo e interpretación simultánea.

A necesidade de dotarse dun sistema electoral novo para o Consello de Administración xurdiu en parte da nova normativa (Título IV da Circ. 285 do Banco de Italia, sobre o novo goberno societario dos bancos) e en parte dos retos que quere afrontar Banca Etica: desde a ampliación da base social e a operativa en España ata as oportunidades que ofrecen as tecnoloxías dixitais e que poden garantir un maior acceso á participación.

A proposta de novo goberno —construída ao longo do tempo grazas a un percorrido de participación e comprobación coas persoas socias e cos diversos «Portadores de Valor» que fan funcionar o banco— procura conxugar o valor da participación coa esixencia de votar a un equipo de goberno para o Consello de Administración que posúa as competencias e os requisitos necesarios e que leve a cabo os obxectivos definidos.

De seguido detallamos as principais novidades:

• Participación activa das persoas socias da cooperativa: desde sempre en Banca Etica, as persoas socias activas organízanse por territorios en grupos (Git) e en Áreas a fin de favorecer o seu contacto co desenvolvemento do banco ao servizo dunha economía sostible. Por primeira vez, os estatutos sancionan oficialmente esta organización territorial das persoas socias.

• Introdución do concepto de «Portadores de Valor» do banco: en Banca Etica non contan só os e as accionistas (shareholders), e nin sequera as partes interesadas (stakeholders), senón que definimos a categoría de «Portadores de Valor»: as persoas socias organizadas nas áreas territoriais (Noroeste; Nordeste; Centro; Sur; España); as persoas socias de referencia (é dicir, as grandes organizacións do Sector Terciario italiano que fixeron nacer Banca Etica e que seguen a soster o seu desenvolvemento); e as persoas socias-traballadoras.

• Introdución do voto a distancia: un cambio importante requirido pola normativa e que nos estimula a dar igual oportunidade de participación na asemblea a todas as persoas socias.

• Posibilidade de facerse socio/a a distancia: cos estatutos novos será posible crear hipotéticos mecanismos en liña que permitan facerse socio/a do banco.

• Introdución do voto por lista: ao contrario que no pasado, as persoas socias xa non votarán a candidatos/as individuais ao Consello de Administración, senón que se lles pedirá que elixan o «equipo» que consideren máis idóneo para gobernar o banco.

• Votación para a elección de candidatos/as individuais (non pertencentes ás listas) incluídos nunha lista específica: os e as candidatas elixidas desta lista entrarán na composición final do Consello de Administración a fin de garantir unha dialéctica efectiva e o pluralismo que caracteriza a nosa base social.

• Posibilidade de formar listas participativas mediante unha solicitude pública de candidaturas e unha sondaxe entre as persoas socias.

Podes facer clic aquí para descargar os Estatutos novos, o Regulamento da Asemblea e a información sobre as vindeiras eleccións ao Consello de Administración.“

Fonte: www.fiarebancaetica.coop

Advertisement

O valor do diñeiro. Banca, finanzas e ética, máis aló do mito do crecemento

19 febreiro 2015

Ugo Biggeri ofrece un verdadeiro instrumento de educación financeira, para entender as cuestións chave na banca, as finanzas e a economía.

Biggeri, presidente de Banca Popolare Etica (máis coñecida como Banca Etica), convida a pensar na economía dunha maneira máis humana, mostrando claramente como as nosas pequenas decisións son importantes. Mesmo mover unha conta corrente pode ser un acto de empoderamento, xa que o noso diñeiro quizais se estea investindo en proxectos que apoien a visión do mundo que nos non gustaría promover. A miúdo, mentres nos esforzamos por unha causa xusta, o noso diñeiro, xestionado polos bancos, está a traballar en contra de nós.

«O valor do diñeiro non está no diñeiro mesmo, senón nas persoas que o usan, nas relacións que favorece, no ben común que crea».

«Que podo facer co meu diñeiro? Como é obvio, podo facer moitas cousas e moi diferentes entre si, pero a primeira de todas é… facerme preguntas! Preguntas sobre o diñeiro, do seu significado, do seu valor, do valor que ten para nós. As preguntas sobre o diñeiro son nos nosos días, queirámolo ou non, preguntas sobre a vida» (Ugo Biggeri).

Precisamos axuda para clarificar cuestións fundamentais sobre os bancos, as finanzas e a economía. Este libro é case unha visita guiada para quen non ten unha formación económica e a miúdo cústalle comprender que é o que está en xogo nas pequenas e grandes decisións que se toman respecto ao diñeiro. El valor del dinero é un ensaio de educación financeira, un estímulo para repensar a economía en termos máis humanos e comprometidos.

Este libro «encerra a maxia de quen coñece moi ben un tema complexo, enténdeo nos seus fundamentos e é capaz de explicalo con sinxeleza e rigor. Esconde verdadeiros tesouros nas súas explicacións, preguntas, respostas, provocacións… e moitas pequenas xoias en forma de experiencias persoais do propio autor. Experiencias coas que, xa o verán, sintonizamos rapidamente, lembrando situacións similares de nosa propia vida» (Tomado do «Prólogo a la edición en lengua española», por Peru Sasia).

Ugo Biggeri

Ugo Biggeri, (Florencia, 1966) é licenciado en Física. Despois de traballar algúns anos na universidade, empezou a dedicarse ao campo ambiental e, posteriormente, ao das finanzas éticas. Na actualidade é Presidente de Banca Etica e Etica Sgr. Tamén imparte clases sobre finanzas éticas e microcréditos na universidade.

Fiare Banca Etica é un banco cooperativo de referencia en Europa. Fiare Banca Etica nace da unión de dous proxectos baseados nas finanzas éticas: Banca Popolare Etica, un banco cooperativo que traballa en Italia desde o 1999 e Fiare que opera en España desde o 2005. Ambos os dous queren ser unha ferramenta ao servizo da transformación social a través do financiamento de proxectos da economía social e solidaria e a promoción dunha cultura da intermediación financeira, baixo os principios da transparencia, a participación, a democracia e o crédito como dereito.

Datos do libro:

El valor del dinero. Banca, finanzas y ética más allá del mito del crecimiento, de Ugo Biggeri
SALTERRAE
ISBN: 978-84-293-2230-9
Páxinas: 160

Fonte: www.fiarebancaetica.coop

En Arrupe Etxea na presentación o 18 de febreiro de 2015 do libro “El valor del dinero” de Ugo Biggeri (presidente de Banca Popolare Etica -BpE). Acompañando a Ugo están Peru Sasia (presidente da Fundación Fiare e membro do Comité de Administración de BpE) e Cristina de la Cruz (responsable do Comité de Avaliación Ética de Fiare Banca Etica e membro do de BpE). Podes escoitar unha entrevista aquí.

Nova relacionada:

Grandes novidades nos derradeiros encontros dos GITs galegos do ano 2014

Xuntanza do GIT Galiza Sur, 2 de decembro de 2014, Vigo.

O martes, 2 de decembro de 2014 en Vigo no local de Proclade (foto da esquerda), e o sábado, 6 de decembro de 2014 na Coruña no local de Zocamiñoca (foto da dereita), puidemos participar nas derradeiras xuntanzas dos dous GITs galegos: GIT Galiza Sur e GIT Galiza Norte, respectivamente.  Foron un pouco máis cativeiras do que é habitual debido a que varias persoas estaban de viaxe ou ocupadas noutros encontros pero os minutos foron ben aproveitados e deron para moito.

Xuntanza do GIT Galiza Norte, 6 de decembro de 2014, A Coruña.

Adicamos a maior parte do tempo a comentar a información recibida sobre as últimas novidades da operativa bancaria; os vindeiros pasos a dar en temas de comunicación (con sorpresas para os primeiros meses do ano 2015); a pór en común o vivido no Encontro Anual do Sistema de Banca Popolare Etica de Bologna (28-29 de novembro de 2014) con toda a información do alí tratado ademais de compartir as experiencias vividas coas compañeiras/os e entidades italianas do Grupo Banca Etica, coas compañeiras/os da Área Fiare e tamén coas traballadoras/es da oficina de Bilbao.  Incorporamos varias persoas ao GIT e estamos pendentes de varias entidades con desexos de seguir a construír esta realidade que é Fiare Banca Etica. Por suposto, tamén deu tempo para presentar numerosas dúbidas, comentarios, inquedanzas, arelas… que foron mostradas para ser dialogadas e reflexionadas.

Como podedes ver estas foron as derradeiras reunións do ano 2014 dos dous GITs galegos pero son un paso máis para seguir traballando, participando, recreando… todo o que virá coa entrada do novo ano 2015.  Seguiremos a comentarvos todo o que os vindeiros meses traerán nos posteriores encontros… Estade atentos/as!

Fiare no I Congreso Internacional de Economía Solidaria

3 Decembro 2014.

A derradeira fin de semana do mes de novembro tivo lugar o I Congreso Internacional de Economía Social e Solidaria (ESS) en Zaragoza. O evento, que reuniu aos principais axentes da Economía Social e Solidaria para discutir os principais retos e oportunidades de futuro, superou os obxectivos de participación da organización con máis de 600 persoas inscritas nas máis de 30 actividades repartidas en nove localizacións por toda a cidade.

“Cando a economía se atopa coas persoas cambiamos o mundo”: Esta lema marcaba as conferencias, talleres, mesas redondas e de experiencias, sesións técnicas, os espazos “meeting” e “Me cambio” dos 4 días do evento.

Durante estes días as persoas participantes puxeron sobre a mesa novos retos de futuro como definir novas formas de traballo, produción e reprodución; xerar formas de resistencia, de coidados, afectos e saberes; identificar as debilidades e descubrir as forzas de poder de cada persoa para crear o cambio; animan a seguir creando movementos de contrapoder popular de base e na rúa; expoñen as potencialidades das moedas sociais e da banca ética, e un longo etcétera de experiencias, prácticas e coñecementos.

Actividades do encontro

Fiare Banca Etica estivo presente cada día en diferentes mesas redondas e conferencias. Peru Sasia participou en “As finanzas éticas, unha ferramenta ao servizo da economía solidaria. Presentación da Mesa de Sistema de Finanzas”, Clara Soler en “Retos das finanzas éticas: As finanzas éticas e a construción de mercados sociais?” e Juan Garibi en “Retos das finanzas éticas: Converter o aforro en crédito”.

Ademais Fiare tamén participou nos espazos “Cooperativismo en consumo para abrir novos sectores e xerar nova oferta; retos de escalabilidade das innovacións cidadás en consumo” e “Financiamento con novos instrumentos: micromeceznagos a pequena escala de proxectos de transformación social”. Todos con gran éxito de participación, moito interese e público especializado.

MeCambio.net

“Sentes que tras os bens e servizos que usas na túa vida cotiá (electricidade, banca, móbil, comida, roupa, etc.) só prevalece maximizar beneficios? Hai alternativas!”. Baixo esta premisa definiuse o espazo MeCambio.net, onde tamén se presentou Fiare. A través de micropresentacións de 8 minutos dábanse a coñecer de primeira man provedores que promoven formas de consumo e produción máis sustentables, xustas e democráticas.

Entrega de Premios ás entidades da Economía Solidaria

O programa do Congreso finalizou coa Gran gala de premios a entidades da Economía Social e Solidaria onde Fiare Banca Etica recibiu o premio “Democracia e intercooperación económica” (dirixido a entidades pioneiras no desenvolvemento de boas prácticas de democracia e cooperación económica, xa sexa dentro das súas propias organizacións e/ou establecendo relacións de intercooperación con outros actores).

Fiare Banca Etica foi recoñecida por “demostrar que se pode intercooperar exitosamente a nivel internacional para lograr que os instrumentos de economía solidaria sexan máis capaces a enfrontarse aos retos que ten diante”, por “xerar unha organización financeira democrática e distribuída territorialmente” xa que “é a fórmula de garantir que o diñeiro responderá a necesidades reais e un medio para favorecer a participación das comunidades no desenvolvemento da cooperativa” e por “conseguir, nos peores anos da crise, unir a vontade, a implicación, e o capital necesario de miles de persoas e centos de organizacións na creación dunha banca internacional, cooperativa, ética e cidadá”. Premio entregado por Liliana Deamicis de REAS Balears e socia de Fiare a Peru Sasia Conselleiro de Fiare Banca Etica.

Os outros premios da gala foron La Fira d’Economía Solidària de Catalunya (Premio Incidencia Política), Desmontando a la Pili (Premio Igualdade de Xénero desde a Economía), RIPESS (Premio Internacional), Som Energia e Goiener Energia (Premio do público para ambas as dúas).

Para quen non puido asistir ao Congreso podedes ver algunha das conferencias nesta ligazón http://economiameeting.net/es/directo/ e a través da rede social Twitter coa etiqueta #economíapersonas ou nos usuarios @economiameeting e @REAS_Aragon. A páxina web do Congreso: http://economiameeting.net/gl/

© Fotografías e información: Arainfo e Reas

Fonte: www.fiarebancaetica.coop

O poder da loita colectiva

Hoxe, xoves 13 de novembro de 2014, ás 12.00 horas vai ter lugar no Edificio Proa de A Coruña a rolda de prensa, convocada por Stop Desafiuzamentos A Coruña, na que Roberto Rivas, bombeiro de A Coruña que se negou a colaborar no desafiuzamento de Aurelia Rey, falará con motivo da sentenza que o condena ao pagamento da sanción por ‘infracción administrativa” e por “provocación de reaccións no público que alteran ou poden alterar a seguridade cidadá”. 

A continuación, compartimos con vós as súas palabras nas que expresa o porqué da súa decisión de abrir unha conta en Fiare Banca Etica (a primeira en Galiza nesta nova etapa) como resposta para poder sufragar as multas impostas non só a el:

“Son Roberto Rivas, bombeiro da Coruña sancionado por negarme a colaborar nun desafiuzamento aínda que despois, se me xulgara por algo totalmente diferente, ‘alteración das masas’.

Bombeiros apoian ao seu compañeiro Roberto Rivas
@gzcontrainfo

A día de hoxe e despois de ver a sentenza teño que acatar a sanción imposta. Isto non é un xuízo contra min, é unha persecución contra todas as persoas que loitan contra todas as inxustizas legais establecidas, ás que moitas de nós denominamos terrorismo institucional.

Non vou recorrer a sentenza porque cremos, que non paga a pena perder o tempo en seguir aportando probas, buscando brechas xurídicas que avalen a miña inocencia.

Non cremos neste proceso, son culpábel de desobedecer e non colaborar nun desafiuzamento pero inocente de alterar ou incitar as masas. Porque o que REALMENTE ALTERA AS MASAS, son os desafiuzamentos en si e non calquera tipo de acción individual ou colectiva.

Por todo isto e aínda que nun principio non quería recibir ningún tipo de axuda, por mor das numerosas mostras de solidariedade recibidas creo convinte aproveitar isto para apuntalar os moventos sociais que realmente están traballando a prol da cidadanía, e por isto que abrín unha conta en Fiare Banca Etica onde se recibirán as achegas para sufragar as multas impostas a todas as persoas que ese día estaban loitando para que non se levara a cabo o noxento desafiuzamento de Aurelia Rey.

Nº de conta FIARE BANCA ETICA:  ES81 1550 0001 2100 0067 9324 “

Máis información: Stop Desafiuzamentos A Coruña