A Administración Pública máis preto de Fiare Banca Etica

20 Novembro 2014

A crise económica mostrou a cara oculta das finanzas convencionais para moitas organizacións, empresas e tamén para as Administracións. Estamos a velo co achegamento nos últimos tempos de diferentes tipos de Administracións que queren pór o seu granciño de area na construción de alternativas reais no campo das finanzas.

administracion-publica-mas-cerca-de-fiare-banca-eticaNo último mes, a Deputación de Lugo asinou un convenio de socios con Fiare Banca Etica. A deputada de Economía, Recadación e Facenda, Pilar García Porto, anunciou que a Deputación Provincial de Lugo “achegará fondos, de forma que pasará a ser un dos máis de 37.000 asociados cos que conta Banca Popolare Etica en toda Europa, 5.000 deles en España” e asegurou publicamente que “esta aposta por unha banca alternativa á convencional” responde ao obxectivo da Deputación de situar ás persoas no centro de todas as políticas públicas”.

Tamén durante o mes de outubro o Concello de Urretxu e Fiare Banca Etica asinaron un convenio de colaboración polo que o Concello pasa a ser socio de Fiare Banca Etica en Gipuzkoa. No acto de presentación por parte de Fiare interveu Periko Etxeburua coordinador do Grupo de Intervención Territorial (GIT) na circunscrición e o Director da operativa bancaria Juan Garibi e por parte do Concello de Urretxu a alcaldesa Oihane Zabaleta. O Concello de Urretxu é o número doce dos que se teñen sumado, ata o momento, á colaboración coa Banca Etica en Gipuzkoa.

Nas Illas Baleares varios concellos tamén deron o paso de apoiar un proxecto cooperativo deste tipo durante este semestre. O alcalde de Esporles, Miquel Ensenyat, e o vicepresidente do Grupo de Iniciativa Territorial (GIT) de Illes Balears, Alexandre Duran, asinaron no principio do ano un convenio de colaboración, polo cal o Consistorio entrou como socio. Pola súa banda, o grupo territorial de Illes Balears resaltou a importancia deste acordo que reforza a construción dunha entidade de intermediación financeira que traballa para a transformación social e a sustentabilidade. Ademais, achega a visión das administracións locais e agranda a base social da cooperativa, que actualmente conta con 4.856 persoas socias, das cales hai 525 entidades e administracións públicas de todo o Estado español. Tamén na illa durante este ano fíxose socio o Concello de Santa María. Rosa Vich a súa alcaldesa afirmou no acto de firma “agora máis que nunca é necesario ter un sistema financeiro responsable e ético, e desde o Concello de Santa María queremos achegar o noso granciño de area para dar a coñecer e participar activamente nesta cooperativa financeira cidadá e ética”.

Actualmente en Fiare son máis dunha trintena o número de administracións socias no conxunto do Estado e esperamos que o sexan moitas máis no futuro.

Fonte: www.fiarebancaetica.coop

O poder da loita colectiva

bombero desahucio en juzgadosHoxe, xoves 13 de novembro de 2014, ás 12.00 horas vai ter lugar no Edificio Proa de A Coruña a rolda de prensa, convocada por Stop Desafiuzamentos A Coruña, na que Roberto Rivas, bombeiro de A Coruña que se negou a colaborar no desafiuzamento de Aurelia Rey, falará con motivo da sentenza que o condena ao pagamento da sanción por ‘infracción administrativa” e por “provocación de reaccións no público que alteran ou poden alterar a seguridade cidadá”. 

A continuación, compartimos con vós as súas palabras nas que expresa o porqué da súa decisión de abrir unha conta en Fiare Banca Etica (a primeira en Galiza nesta nova etapa) como resposta para poder sufragar as multas impostas non só a el:

“Son Roberto Rivas, bombeiro da Coruña sancionado por negarme a colaborar nun desafiuzamento aínda que despois, se me xulgara por algo totalmente diferente, ‘alteración das masas’.

Bombeiros apoian ao seu compañeiro Roberto Rivas @gzcontrainfo
Bombeiros apoian ao seu compañeiro Roberto Rivas
@gzcontrainfo

A día de hoxe e despois de ver a sentenza teño que acatar a sanción imposta. Isto non é un xuízo contra min, é unha persecución contra todas as persoas que loitan contra todas as inxustizas legais establecidas, ás que moitas de nós denominamos terrorismo institucional.

Non vou recorrer a sentenza porque cremos, que non paga a pena perder o tempo en seguir aportando probas, buscando brechas xurídicas que avalen a miña inocencia.

Non cremos neste proceso, son culpábel de desobedecer e non colaborar nun desafiuzamento pero inocente de alterar ou incitar as masas. Porque o que REALMENTE ALTERA AS MASAS, son os desafiuzamentos en si e non calquera tipo de acción individual ou colectiva.

Por todo isto e aínda que nun principio non quería recibir ningún tipo de axuda, por mor das numerosas mostras de solidariedade recibidas creo convinte aproveitar isto para apuntalar os moventos sociais que realmente están traballando a prol da cidadanía, e por isto que abrín unha conta en Fiare Banca Etica onde se recibirán as achegas para sufragar as multas impostas a todas as persoas que ese día estaban loitando para que non se levara a cabo o noxento desafiuzamento de Aurelia Rey.

Nº de conta FIARE BANCA ETICA:  ES81 1550 0001 2100 0067 9324 “

Máis información: Stop Desafiuzamentos A Coruña

Entre novidades e dificultades, ilusión

Á dereita, Vicente, parte do equipo profesional de Fiare Banca Etica, na oficina de Bilbao.

Á esquerda, Vicente, parte do equipo profesional de Fiare Banca Etica, na oficina de Bilbao conversando cunha persoa socia.

Este primeiro mes foi probablemente o máis complicado da nosa historia.  Pensabamos, quizais, que o paso de axente a operativa con establecemento ía volver todo máis fácil e automático de forma inmediata.  Con todo, atopámonos cunha chea de novidades que dixerir, sistematizar e procedimentar.  Abonar o primeiro cheque, certificar a primeira conta ante unha administración, a primeira solicitude de cambio de titularidade por defunción…  Cuestións que son o día a día de calquera entidade, tiñan que ser feitas por primeira vez e ver que todo funcionaba.  Igualmente, a posta en marcha dunha nova web, co seu boletín de noticias, permite unha mellor e máis fluída comunicación coa sociedade.  Con todo, só chegamos a tempo na versión en castelán.  Nos primeiros días de novembro xa se habilita a sección para persoas e organizacións clientas, cos diversos idiomas, que se irán incorporando á web principal o máis axiña posible.

Mentres tanto, recibimos este mes [outubro de 2014] máis de 300 correos electrónicos de persoas e organizacións pedindo información, para abrir unha conta, solicitar un crédito, converterse en persoa socia.  Vímonos desbordados/as por esta demanda, que tentamos ir resolvendo como puidemos.  A pesar de que decidimos non facer publicidade da nosa actividade para evitar estas situacións, parece que as redes sociais e as comunicacións informais persoa a persoa superaron os cálculos previos.

Despois deste primeiro choque de realidade do que saímos vivas e vivos grazas á motivación do persoal, ao apoio da nosa base social e á renovación do seu compromiso nesta nova fase histórica, agora toca recuperar o sentido da realidade, marcado polas prioridades que xa nos determinamos previamente:

  • Atención prioritaria á nosa base social e ás persoas e organizacións que eran clientas con antelación, para adecuar a súa situación á nova realidade.
  • Procura de ampliación do noso financiamento a partir das organizacións coas que xa traballabamos previamente neste tipo de produtos/servizos.

Tras consolidar o que xa tiñamos traballado, iniciaranse nos vindeiros meses, dúas liñas de traballo adicionais, coas máis de 5.000 persoas e organizacións que constituían a nosa base social previamente; converter o seu compromiso na compra formal de accións de Banca Popolare Etica, e abrirlles as posibilidades de comezar a operar coa nosa nova oferta de servizos a través de internet.

Nese camiño, tentaremos acompañar da mellor maneira posible aos grupos de persoas socias por todo o territorio, tentando que a súa ilusión nos transmita a motivación e pulos necesarios para poder seguir adiante con esta inmensa tarefa.

Fonte: www.fiarebancaetica.coop

Lugo, 17 e 18 de outubro, un gran encontro en Galiza para Fiare Banca Etica

cartaz_ xornada_informativa-18out2014Hai pouco máis dunha semana (o 17 e 18 de outubro de 2014) puidemos participar nas Xornadas organizadas en Lugo para ofertar información especializada (xornada técnica dirixida ás administracións locais do 17 de outubro de 2014) e máis informal (xornada informativa para toda a cidadanía do 18 de outubro de 2014) para todas as persoas que desexaran coñecer polo miúdo (o día anterior, xoves 16 de outubro tamén puidemos compartir con Juan Garibi dúbidas e respostas con algunhas persoas socias en Compostela) que é Fiare Banca Etica e os cambios que se están levar a cabo nos últimos e vindeiros meses neste proxecto que xa é unha realidade.  En ambos os dous momentos contamos coa presenza de Juan Garibi, membro do equipo de Fiare Banca Etica (podes escoitar como nos transmite o transcurrir da nova etapa da entidade, recén iniciada coa apertura da nova oficina de Bilbao, neste enlace da entrevista feita en “Es posible” de Radio Popular – Herri Irratia: http://bit.ly/1vXE72A, en mp3).

O venres, 17 de outubro, asistiron unhas 30 persoas (distintos alcaldes e concelleiros de distintos concellos da provincia de Lugo e persoas traballadoras da administración local). O sábado, 18 de outubro, pola mañá contamos coa participación dunhas 60 persoas con moitas preguntas por facer e con gran sede de saber. As inquedanzas xiraron sobre a operativa bancaria e se o crecemento permitiría manter íntegros os ideais. Nalgún caso as preguntas foron moi concretas e outras máis filosóficas (en que punto das finanzas éticas se encadra Fiare).  Tamén houbo preguntas máis prácticas: que supón ser persoa socia, cando me podo facer cliente/a, cando comeza a operativa a funcionar… Por suposto houbo oco tamén para as cuestións sobre os empréstitos.

A impresión xeralizada foi moi positiva, especialmente a xornada do sábado e que contamos coa presenza dunha nova persoa socia xurídica máis, a Deputación de Lugo e varios outros colectivos cada vez máis interesados en formar parte da banca ética.

GITGalizaNorte-Lugo-out2014

Algunhas das persoas socias que forman parte do GIT Galiza Norte. Local de A Cova da Terra, Lugo. 18 de outubro de 2014.

O mesmo sábado pola tarde aproveitamos para ter a primeira xuntanza do GIT Galiza Norte tras o verán.  Serviunos a todas as persoas alí presentes para coller forzas e así acometer todas as tarefas anunciadas na reunión de GITs que tivo lugar do 26 ao 28 de setembro en Bilbao e que se presentan durante as vindeiras semanas e das que vos iremos informando puntualmente.  Aproveitamos para lembrarvos que o nome é Fiare Banca Etica (sen acento ortográfico) porque é a unión de Fiare e de Banca Popolare Etica (en Italia moi coñecida polo nome Banca Etica).

A continuación podedes desfrutar dun pequeno percorrido fotográfico por estes dous días de intenso traballo, de convivencia e de compartir inquedanzas e arelas comúns.

Xornadatecnica-Lugo-17out2014

Xornada técnica con Juan Garibi o 17 de outubro de 2014 no Salón de actos da Deputación de Lugo, Lugo.

Roller-FiareBancaEtica

“Vela” que non acompañará aos GITs en Galiza nesta nova etapa de Fiare Banca Etica.

Xornadainformativa-Lugo-18out2014-JuanGaribi

Juan Garibi na xornada informativa o 18 de outubro de 2014 no Salón de Actos da Deputación de Lugo, Lugo.

Xornadainformativa-Lugo-18out2014

Esteban, coordinador do GIT Galiza Norte; Lucía, representante do Grupo Local de Lugo e Gonzalo, secretario da Asociación Fiare Galiza. na Xornada informativa o 18 de outubro de 2014, Lugo.

ReunionGITGalizaNorte-Lugo-18out2014

Encontro de traballo e de compartir do GIT Galiza Norte o 18 de outubro de 2014 no local de A Cova da Terra, Lugo.

Coñece máis de Fiare Banca Etica!

Fiare-eventos-4T2014Se queres coñecer máis de preto a Fiare Banca Etica, na axenda da nosa páxina de facebook podes ver algúns dos eventos onde poderás atoparnos.  Iremos publicando nela as actividades e actos onde participaremos: https://www.facebook.com/ProyectoFiare/events

Nas vindeiras semanas estaremos:

A información máis concreta das actividades en Galiza está en Actividades.

Novo tríptico de Fiare Banca Etica!

postal-FBEComo ben sabedes, nas últimas semanas estamos poñéndonos ao día tendo en conta a nova tan importante que tivo lugar o 1 de outubro de 2014.  Por todo isto, estamos constantemente anovando materiais, web, blogue… polo que vos pedimos desculpas.

Hoxe chegou o momento de presentarvos o novo tríptico de Fiare Banca Etica en galego e o novo díptico en castelán.  Agardamos que vos parezan interesantes:

Para calquera dúbida xa sabedes onde contactar connosco.  Grazas polo voso apoio e compromiso con este gran proxecto!

A Deputación de Lugo aposta pola Banca Ética

O Salón de Actos de San Marcos acollerá a celebración de dúas xornadas, unha técnica e outra informativa, gratuítas os días 17 e 18 deste mes, organizadas polo grupo local de Fiare Banca Etica. A asistencia é libre e gratuíta ata completar aforo.

Así o anunciou hoxe Pilar García Porto, quen destacou que “as novas maneiras de facer políticas públicas tamén pasan por comprometerse coas persoas, apoiando o nacemento de proxectos locais cun positivo impacto social.

deputacion-XornadaFBEA Deputación de Lugo acollerá unhas xornadas, dirixidas tanto ás administracións como á cidadanía, para dar a coñecer este proxecto de banca ética na provincia. As dúas xornadas celebraranse no Salón de Actos do Pazo de San Marcos os días 17 e 18 de outubro, e serán de carácter técnico e informativo, respectivamente. Estas xornadas están organizadas polo grupo local de Fiare Banca Etica, o banco cooperativo máis importante de Europa e que conta con máis de 37.000 asociados.

Así o anunciou hoxe a Deputada de Economía, Recadación e Facenda, Pilar García Porto, quen destacou que a colaboración da institución luguesa con esta banca alternativa, “está en consonancia coas políticas públicas que este organismo está levando a cabo e que sitúan ás persoas como prioridade”. A Deputada salientou que “as novas maneiras de facer políticas públicas tamén pasan por comprometerse coas persoas, apoiando o nacemento de proxectos locais cun positivo impacto social”.

García Porto, que estivo acompañada de Xabier Bruña, coordinador local de Fiare Galiza, puxo como exemplo deste compromiso coas persoas diversas iniciativas da Deputación de Lugo, como a incorporación de cláusulas sociais en todos os contratos de obras e servizos, que fixo da institución luguesa o primeiro organismo provincial de España e pioneira entre as administracións públicas de Galicia en blindar os dereitos dos traballadores fronte aos posibles abusos que poidan cometer as empresas escusándose na reforma laboral; ou o ser a 1ª institución provincial do país en contar cuns orzamentos participativos, incorporando á cidadanía na toma de decisións provincia, propoñendo e opinando sobre os asuntos públicos de cara a mellorar a súa calidade de vida.

Programación das xornadas

As xornadas organizadas pola Deputación e Fiare Banca Etica terán lugar os días 17 e 18 de outubro no Salón de Actos do Pazo de San Marcos e, tal e como destacou García Porto, están dirixidas tanto ás administracións coma á cidadanía. A asistencia é libre e gratuíta, só limitada polo aforo.

En canto á xornada técnica do día 17, que se desenvolverá entre as 10:30 e as 13:00 horas, o Director de Operacións de Fiare Banca Etica, Juan Garibi, abordará cuestións de carácter máis específico, dirixidas a institucións e administracións, co fin de que estas coñezan as liñas de acción e funcionamento da Fiare Banca Etica, así como as ferramentas das que dispón para o apoio de proxectos de carácter local: desenvolvemento de proxectos no rural ou calquera outro tipo de iniciativas ecolóxicas e socialmente responsables.

Por outra banda, a xornada informativa do día 18 está dirixida ao público en xeral, para que coñezan esta cooperativa de crédito, os depósitos de aforro dos que dispón e cos que se financian proxectos vencellados á loita contra a exclusión social, a cooperación ao desenvolvemento, a agricultura ecolóxica ou o comercio xusto. Neste caso, a xornada desenvolverase de 10:00 a 14:00 horas, e os expertos encargados serán Gonzalo Gesto, secretario de Fiare Galiza; Esteban González, coordinador do GIT Galiza Norte e, novamente, Juan Garibi.

Que é Fiare Banca Etica.

Fiare Banca Etica ten a súa orixe na unión de dous importantes proxectos de financiamento ético: a Banca Popolare Etica, banco cooperativo italiano nacido no 1999, e Fiare, que opera en España dende o 2005.

Este banco cooperativo conta entre os seus máis de 37.000 asociados tanto con institucións como con cidadanía, que coas súas aportacións xeran un capital social que supón formar parte dun proxecto de “democracia económica”. Os asociados, dos que xa forma parte a Deputación de Lugo, son os propietarios do banco cooperativo, fomentando o seu desenvolvemento coas súas aportacións e asegurando a súa independencia dos grandes grupos económico-financeiros.

A súa estrutura organizativa funciona a nivel local, de xeito que conecta funcionalmente a actividade do Banco coas necesidades particulares e proxectos máis vantaxosos para cada territorio, permitindo que os asociados participen de maneira directa na vida do banco.

Fonte: www.deputacionlugo.org

Diputacion-FiareBancaEtica-Lugo-outubro2014

A Deputación de Lugo, pioneira en España en traballar coa banca ética

A Deputación de Lugo vén de converterse na primeira institución provincial de España en formar parte da banca cooperativa, grazas ao convenio asinado con Fiare Banca Etica, a maior entidade cooperativa de crédito de Europa, do que deu conta hoxe a deputada de Economía, Recadación e Facenda, Pilar García Porto, e co que a institución luguesa achega fondos pasando a ser un dos máis de 37.000 asociados cos que conta Banca Popolare Etica en toda Europa, 5.000 destes en no Estado español.

García Porto fixo este anuncio durante a inauguración das xornadas técnicas e informativas que comezaron hoxe no Salón de Actos do Pazo de San Marcos e que continuarán mañá, na que estivo acompañada polo representante do Grupo Local de Lugo de Fiare Banca Etica, Xabier Bruña, e o director de Operacións de Fiare Banca Etica, Juan Garibi, un dos poñentes das xornadas. García Porto subliñou que esta aposta por unha banca alternativa á convencional responde ao obxectivo da Deputación de Lugo de “situar as persoas no centro de todas as políticas públicas”, así como ao de traballar sempre de xeito transparente, xa que “o feito de que calquera poida saber en todo momento que somos, que facemos e como o facemos, é a maior mostra de respecto pola cidadanía e polos seus dereitos que se pode facer dende as institucións”.

Con esta achega, tal e como destacou a deputada, o organismo provincial contribúe a incrementar o capital social desta banca cooperativa, na que “todos os asociados son propietarios, asegurando así a súa independencia e facendo desta banca un proxecto de democracia económica”. Esta banca cooperativa centra a súa acción no desenvolvemento de iniciativas socialmente responsables, especialmente aqueles relacionados coa educación, a agroecoloxía, a inserción sociolaboral das persoas ou o comercio xusto.

Como funciona Fiare Banca Etica?

A achega económica da Deputación pasará a formar parte do capital social de Fiare Banca Etica e estará destinada, ao igual que o capital aportado por todas as persoas socias, a financiar proxectos que prioricen o respecto ao medio ambiente e a creación de postos de traballo en ámbitos como a prestación de servizos ou outras actividades produtivas.

Os proxectos candidatos a recibir financiamento son avaliados por comisións que traballan a nivel local e que están formadas por persoas socias elixidas en asemblea. Estas comisións son unha ferramenta esencial para a Fiare Banca Etica, xa que o feito de que funcionen a nivel local favorece que os seus membros coñezan de primeira man o tecido social e organizativo do territorio e traballan con criterios de viabilidade moi axustados á realidade.

Unha vez aprobados os proxectos por parte destas comisións locais, a súa viabilidade económico-financeira é analizada pola operativa bancaria. Fiare Banca Etica forma parte da Federación Europea de Finanzas e Bancos Éticos e Alternativos (FEBEA), unha organización sen ánimo de lucro con sede en Bruxelas.

Fonte: blog.deputaciondelugo.org

Seguir

Recibe aviso de cada artigo novo no teu correo electrónico.

Únete aos outros 1.484 segidores