As finanzas locais alternativas artéllanse nunha estratexia común

Domingo, 21/09/14

Lugar da noticia:  Porto de Santa María, Cádiz.

Encontroentidadesparabancarias-set2014-IA rede estatal de finanzas alternativas e solidarias, que agrupa a organizacións do estado español (Andalucía, Castela e León, Cataluña, C. Valenciana, Estremadura, Navarra e Galicia), celebrou o seu terceiro encontro no Porto de Santa María (Cádiz).

Estas iniciativas promoven a utilización do aforro de persoas que se comprometen a prestalo a proxectos de economía solidaria. Estas axudas abarcan desde o apoio a empresas para o sostemento e a creación de emprego e autoemprego estables, até a cobertura de necesidades básicas de persoas en situación ou risco de exclusión social.

Durante a pasada fin de semana, os días 20 e 21 de setembro, representantes de once organizacións, que agrupan a medio centenar de entidades, reuníronse para compartir experiencias e seguir traballando no proceso de confluencia iniciado fai xa tres anos.

O programa de traballo incluíu o circuíto das finanzas locais alternativas, as posibilidades e límites da actividade parabancaria no marco das finanzas éticas, e a súa vinculación e sinerxía no sistema de finanzas construído desde Fiare Banca Etica.

Estas iniciativas de financiamento alternativo enmárcanse no denominado mercado social, que conecta a produtores, distribuidores, consumidores e financiadores en redes de apoio mútuo. Ademais, potencia a visibilidade, a lexitimidade, a viabilidade e a sustentabilidade destas alternativas solidarias de transformación económica e social.

A economía solidaria comparte os principios de equidade, traballo digno, sustentabilidade ambiental, cooperación, sen ánimo de lucro e compromiso coa contorna. A actividade financeira é un elemento clave no soporte a este tipo de iniciativas.

Baixo estes criterios, este encontro de traballo posibilitou o acordo para a constitución como asociación estatal das finanzas alternativas e solidarias, e a súa incorporación á Fundación Fiare.

Encontroentidadesparabancarias-set2014

Fonte: Portal de Economía Solidaria.

“Avanzando na dinamización local con recursos propios”, Curso de Extensión Universitaria – Universidade de Vigo, 9-12 setembro

curso_bueu
A Universidade de Vigo ofrece un Curso de Extensión Universitaria “Avanzando na dinamización local con recursos propios” do 9 ao 12 de setembro de 2014, que se desenvolve en Bueu, na Aula do Museo Massó. Promovido polo Grupo de Investigación en Economía Ecolóxica e Agroalimentaria (gieea) ofrece un interesante plantel de experiencias cooperativas entre outras máis.

O curso tratará de:

- Facer partícipe á cidadanía de experiencias dinamizadoras que empreguen recursos locais.

- Realizar transferencia de coñecemento a emprendedores(as) locais das fórmulas cooperativas de organización para o desenvolvemento de iniciativas dinamizadoras a partir de recursos xerados por entidades coas que colabora GIEEA.

- Facer partícipe á cidadanía das posibilidades de financiamento alternativo en Galicia para as iniciativas dinamizadoras.

Inclúe charlas sobre o modelo cooperativo (Federación de cooperativas Sinerxia), sobre financiamento ético na economía social (Coop57 e Fiare), experiencias cooperativas como Monte Cabalar (cooperativismo para a xestión do territorio e dos recursos propios),  Biocoop (innovación no rural empregando razas de vacún autóctono), Nornas (turismo, ocio e cooperativismo), Árbore (cooperativismo de consumo e o seu papel no fomento dos novos proxectos agroecolóxicos) Milhulloa (aproveitamento das plantas mediciñais e hortalizas), Trespés (as algas como recurso de aproveitamento local), O canto da balea (promoción da pesca artesanal responsable), ademais de temáticas sobre as Comunidades de Montes, biomasa forestal, hortas, recursos mariños, conservas e afumados …

Fai clic : Programa – Avanzando na dinamización local con recursos propios

Información: Grupo de Investigación en Economía Ecolóxica e Agroalimentariaecoecoagro@uvigo.es – http://webs.uvigo.es/economiaecoloxica/http://extension.uvigo.es/extension_gl/cultura/cursos/

Fonte: ugacota.coop

Fiare con grandes novidades neste mes de setembro!

Fiare-BancaEticaHoxe comeza o mes de setembro de 2014.  Vai vir cargado de grandes novidades para Fiare Banca Etica.  Pouco a pouco iremos informándovos de todas elas.  Polo momento podedes consultar (actualizados a 1 de setembro de 2014) o documento e a presentación (ampliada e sinxela) que poden dar luz ás vosas dúbidas.  Faise referencia, entre outros acontecementos e informacións, ás boas novas do noso primeiro proxecto financiado por Fiare en Galiza desde a creación da asociación Fiare Galiza e de que o Banco de España outorgou a Fiare Banca Etica a inscrición no rexistro de entidades financeiras co número 1550.

Lembrámosvos que Fiare son as siglas da “Fundación Inversión e Aforro Responsable” (Fiare) que é unha fundación sen ánimo de lucro creada no ano 2002 por 62 organizacións de cooperación e reinserción social para fundar un banco social e alternativo en Euskadi, e que se convertiu nunha iniciativa en rede a nivel estatal. Dende o ano 2005, Fiare estaba funcionando cun contrato de axente exclusivo de Banca Popolare Etica, S. Coop. (BpE) no Estado español. Nestes momentos estamos no proceso de integración con esta cooperativa de crédito sen ánimo de lucro con 15 anos de historia que permitiu a constitución dunha cooperativa de crédito europea polo que xa somos Fiare Banca Etica.

No proceso actual estanse unindo capital e bases sociais. Ao longo do ano 2013 conformouse a nova estrutura territorial e organizativa de Fiare Banca Etica, resultante da adaptación ao formato da BpE. Na asemblea de Fiare Galiza do día 19 de xaneiro de 2013 celebrada en Teo, formáronse as dúas circunscricións de Galiza (Fiare Galiza Norte e Fiare Galiza Sur) cos seus respectivos Grupos de Implantación Territorial ou GIT (GIT Galiza Norte e GIT Galiza Sur), que serán os órganos de coordinación no territorio galego.

Fiare Banca Etica ofrecerá unha alternativa moi esperada a miles de persoas en Galiza, defraudadas coas prácticas da banca tradicional, ou que queremos unha entidade que cumpra todas as funcións básicas da banca -depósitos, domiciliacións, transferencias, pago con tarxeta-, pero coa máxima transparencia e coa seguridade de que o noso diñeiro non alimentará procesos especulativos nin servirá para financiar proxectos escasamente éticos. Non só iso, os cartos que xa manexa e manexará Fiare Banca Etica serven para financiar cada ano moitos proxectos ligados á economía social, á agricultura ecolóxica, á cooperación ao desenvolvemento ou á actividade produtiva de cooperativas.

Fiare, polo tanto, leva anos funcionando como entidade financiadora de proxectos transformadores, sendo nos últimos tempos de gran axuda para moitas cooperativas ou pequenas empresas. Esta necesidade púxose claramente de manifesto ultimamente, neste momento en que o acceso ao crédito de moitas persoas e organizacións viuse severamente restrinxido e no que o número de solicitudes de financiamento que recibiu Fiare aumentou moi significativamente.

Unha cita moi interesante para a primeira fin de semana de setembro!

Lembrámosvos que na primeira fin de semana do mes de setembro temos unha gran cita en Salvaterra de Miño no Festival da Poesía no Condado “Escrever nas Margens” (28º ed.).  Participaremos na mesa redonda que terá lugar ás 12:30 horas do sábado 6 de setembro de 2014.

Anímate a participar e a coñecer máis de Fiare-Banca Etica!

programa_web

cartaz_festival2014_PANT

O domingo 31 de agosto falaremos de Fiare-Banca Etica na Feira Imaxinaria. Anímate a coñecernos!

Estaremos na Feira Imaxinaria (Valadares, Vigo) falando de Fiare-Banca Etica na mesa redonda que terá lugar na mañá do domingo 31 de agosto de 2014 sobre “Economías alternativas”.

Anímate a participar neste gran proxecto!

FeiraImaxinariaagosto2014

Grandes novidades en Fiare!

20140215_101236Como podes ler, ultimamente temos moito que celebrar.  Ademais sabemos que podes ter moitas preguntas que facer ou desexos de coñercer máis polo miúdo este proxecto de banca nas mans da cidadanía polo que che ofrecemos esa posibilidade,  Se queres saber máis podes acudir ao documento resumo que che presentamos a continuación: momento-actual-Fiare-BpE-12agosto2014-FAQs.

Para calquera dúbida podes contactar connosco nos puntos de información-difusión que tes en Achégate!

Moitas grazas polo teu apoio, difusión, traballo, aportacións, ideas, dúbidas, comentarios…!  Sen ti non tería sido posible anunciar tantas boas novas.

Se nos axudas a construír Fiare Banca Etica

avanzaremos máis rápido!

Primeiro proxecto financiado por Fiare en Galiza!

slg_logoEn Fiare Galiza estamos de noraboa!  Podémosvos anunciar que xa temos o noso primeiro proxecto financiado por Fiare en terras galegas.  Por ese motivo consideramos Fouce302-maio-xunho2014-portadamoi interesante, dada a súa especial relevancia no contexto rural galego, facerlles chegar unha serie de preguntas (complementarias do artigo da última revista “Fouce”) que nos respostaron encantadas/os.  A continuación tedes as razóns, arelas, inquedanzas… que levaron ao Sindicato Labrego Galego (SLG) a formar parte de Fiare, a apoialo e ademais a contar connosco cando pensaron no financiamento.

- O SLG é unha das socias fundadoras de Fiare Galiza. Por que a vosa organización decide apoiar as finanzas éticas?

Porque no SLG somos conscientes de que o actual sistema bancario é discriminatorio para quen traballa ou produce, o piar de moitas desigualdades sociais e de agresións ao medio e en grande medida é tamén o causante da actual crise. Precisamente, para poder decidir sobre os destinos dos nosos aforros o SLG apostou por Fiare, para aportar transparencia, a xustiza social, a través dun sistema financeiro de carácter non especulativo co pouso dos movementos sociais.

- Por que o SLG apostou por Fiare para solicitar financiamento? Valorastes outros bancos-entidades de crédito antes de Fiare?

Para ser consecuentes co anterior. Decidiuse solicitar a póliza a FIARE sen valorar outras entidades nese momento, posto que o SLG levaba anos obtendo financiamento a través da banca convencional. E polos problemas operativos de Fiare, despois de todo ese tempo de trámites en pequena medida volvemos a recorrer.

- Para poder acceder a financiamento con Fiare é preciso cumprir cuns criterios en relación á esfera ético-social. Que tipo de proxecto desenvolve o SLG?

O Sindicato Labrego Galego é un proxecto vivo e en marcha cara a unha agricultura labrega, sostible, nun mundo solidario baseado na Soberanía Alimentar.

- En xeral, cales son os principais retos do mundo rural galego na actualidade?

Para manter un medio rural vivo, é necesario potenciar, no marco dun desenvolvemento rural que teña como eixo fundamental a produción agro-gandeira e silvicultura sostible, actividades socioeconómicas derivadas e diversas, a mellora das estruturas e servizos públicos de calidade incluídos uns servizos sociais adecuados o medio. O rural galego ten hoxe o reto de sobrevivir con xente que produza alimentos, é esencial para todas as galegas e galegos que sexa realidade

En que medida poden pasar as alternativas de futuro pola economía social e solidaria? Como poden axudar as finanzas éticas e en concreto o proxecto Fiare – Banca Etica a fomentar estas alternativas dentro do rural?

Tendo en conta que o poder actual esta na especulación financeira, e imprescindible crear instrumentos financeiros non especulativos, produtivos e que a maiores teñan en conta a microeconomía polo que estamos a pasar a sociedade en xeral e nas explotacións en particular, no SLG pensamos que o futuro vai pasar necesariamente pola economía social. Cremos que Fiare encaixará neste modelo.

Moitas grazas compañeiras e compañeiros do SLG, que fixestes posible o desenvolvemento de Fiare en Galiza, por confiar en nós no quefacer diario, inesquecible… do voso gran proxecto!

SLG-8maio2014

Isabel Vilalba Seivane, secretaria xeral do Sindicato Labrego Galego, con Gonzalo, persoa socia de Fiare Banca Etica.

Seguir este blog

Recibe aviso de cada artigo novo no teu correo electrónico.

Únete aos outros 1.426 segidores