Estas dúas últimas semanas estiveron cheas de actividades e de encontros que lle dan novos pulos ao proxecto Fiare-BpE por estas terras:
– O sábado 9 de febreiro de 2013 pola mañá puidemos participar na primeira reunión da Xunta Directiva de Fiare Galiza tras a III Asemblea (19 de xaneiro de 2013), a Asemblea de Coop57 e xa pola tarde asistimos gustosos ás xornadas organizadas pola Universidade Cromática, tituladasII Voces da Periferia “Encontros do novo pensamento político e crítica económica”. durante as que as persoas participantes fixeron achegas e afondaron mediante un frutífero diálogo na problemática política e económica do mundo circundante poñendo o acento nas limitacións do sistema capitalista e da democracia e, sobre todo, reflexionando entorno ás novas propostas que xorden na periferia do pensamento hexemónico na Capela do Pilar de Corcubión.
– O domingo 17 de febreiro de 2013 fomos invitados pola Coiga (Cooperativa Integral Galega) a participar nunha mesa redonda ás 11:30 horas no centro cultural Val de Flores da parroquia de Baldráns (Concello de Tui) xunto con Coop57. Puidemos contar coa presenza de máis dunha ducia de veciñas e veciños desta parroquia que se mostraron moi interesadas/os en todo o alí exposto.
– Onte, luns 18 de febreiro de 2013, ás 19:30 horas, xuntáronse as persoas socias da zona da Coruña na súa reunión bisemanal do grupo local de Coruña.
– Hoxe, martes 19 de febreiro de 2013, terá lugar ás 18:15 horas na aula 2 da Escola Universitaria de Traballo Social da Universidade de Santiago de Compostela unha mesa redonda sobre finanzas éticas á que están convidadas persoas de Fiare Galiza, AIS O Peto e Coop57 Galicia que falarán das últimas novidades nestes tres proxectos e seguirán afondando nos retos asumidos dos vindeiros meses.
– Mañá, mércores 20 de febreiro de 2013, comeza o ciclo de cinema “Coñecer para Cambiar” organizado por Amarante-Setem, Verdegaia e a Asociación Veciñal A Xuntanza coa proxección do documental “Co teu diñeiro”.
– O xoves 21 de febreiro ás 19:30 horas participaremos xunto con AIS O Peto, Coop57 Galicia e Triodos Bank invitados pola ONGD “Jóvenes y Desarrollo”. Celebrarase no Auditorio da Hospedería en San Martín do Pinario esta mesa redonda sobre o “Artellamento do Finanzamento Ético en Galicia”. O seu obxectivo fundamental é facer visible outros modelos de xestión bancaria e outra forma de facer economía que son posibles e axudan a achegar condicións de vida digna a miles de persoas. Estes movementos apostan e constrúen unha economía solidaria en coherencia cos valores de democracia, xustiza social e respecto medioambiental. Na mesa redonda coñeceremos tamén os proxectos que as organizacións participantes levan a cabo en Galicia e que axudan a mellorar a vida das persoas e as sociedades. A chamada “Economía Real” principio fundamenta da Banca Ética xunto co de transparencia.
– En breve verémonos en Celanova.
– O sábado 23 de febreiro de 2013 ás 10:30 horas no local de Verdegaia (R/ Pombal, nº 18, Baixo de Santiago de Compostela) teremos a oportunidade de traballar pola mañá na Segunda Forma Xurídica de Fiare-BpE. Como xa sabes, o proxecto Fiare está nun momento de profunda transformación estrutural no que se procederá a súa integración na cooperativa de crédito da Banca Popolare Etica (BpE). A dinámica cooperativa implica incorporarnos á estrutura de participación da BpE, baseada sobre o principio dunha persoa un voto e que se artella sobre a rede de Grupos de Implantación Territorial (GITs), contando Galiza con dous: GIT Galiza Norte e GIT Galiza Sur. Fiare será a quinta área da cooperativa e estará asentada nos grupos locais de socias e socios que imos consolidando en todo o Estado. Este proceso de cambio intenso déixanos enriba da mesa algún debate que teremos que ir pechando. Un deles é a posible posta en marcha dunha Segunda Forma Xurídica asociada á estrutura bancaria e que agrupe á rede de colectivos que construíron o proxecto Fiare. A idea é manter unha estrutura na que os colectivos que veñen traballando estes anos no proxecto Fiare, poidan seguir a facer ese labor de sensibilización, denuncia, apoio da actividade parabancaria… Todo este camiño está por andar, e é por este motivo polo que desde a asociación Fiare Galiza convócase a todas as persoas socias do proxecto, especialmente aos colectivos e organizacións que serán quen lle dea forma a esta posible Segunda Forma Xurídica, a esta xornada monográfica. Os puntos principais desta xornada serán: coñecer e resolver dúbidas á proposta xurdida desde Fiare Euskadi aproveitando a estrutura da propia Fundación Fiare, coñecer o estado do debate noutras territoriais do Estado, intercambiar as opinións e ideas dos colectivos da Asociación Fiare Galiza.
– O mesmo sábado 23 de febreiro pola tarde ás 16:00 h no local social de Verdegaia (Rúa do Pombal, 18 – baixo) en Santiago de Compostela será a primeira reunión do Grupo de Implantación Territorial (GIT) Galiza Norte (no que conflúen persoas socias de Fiare Galiza das provincias de Coruña e Lugo) tras a súa constitución o 19 de xaneiro de 2013. Aquí podedes ver un resumo da orde do día:
1.- Aprobación da acta da xuntanza anterior.
2.- Traballo do GIT: definición do GIT (elección de cargos, domicilio social, funcións, obxectivos 2013, dinámica de traballo, tempos e lugares de xuntanzas, puntos de información, outros…), definición das vogalías/comisións (funcións, obxectivos 2013…), o papel dos grupos locais, información da Xunta Estatal, II Asemblea Estatal de persoas socias(16 de marzo de 2013)…
3.- Varios
4.- Convocatoria da vindeira xuntanza.
5.- Lectura e aprobación da acta desta reunión.
Filed under: Banca Popolare Etica,Eventos,Fiare Banca Etica,Fiare GZ |
Deixar un comentario